十二樓 | 翰林

翰林，乃中國真正嘅天之驕子；個個都飽讀詩書、滿腹經綸，被皇帝賞識嘅往往都會被委派為翰林學士，擔當國家嘅棟樑。

 

就係如此出色的一群人，由古代時空穿越，降臨位於黃金地段嘅沙宣道，利銘澤堂。

 

他們研究嘅再也不只是四書五經，詩詞歌賦，而係⋯

 

進入翰林，首先要弘揚國粹，但唔係喺古代已經日日捉嘅圍棋象棋，而係麻雀。麻雀鬥智鬥力鬥心態鬥運氣，本就危機四伏，強敵環伺，一唔小心就足以令人墮進萬呎深淵。坐擁全hall唯二嘅自動麻雀機，撳個掣就可以開台，成日得閒就黎打返四圈。大家一個唔留神就打到天光，然後就會叫番個早餐食，跟著又返到將麻雀台上繼續戰鬥。

 

作為天之驕子，定必能文擅武，除了時常陷入麻雀競技場不肯抽身外，有不少人也會選擇到一旁嘅K機大展歌喉，釋放日常生活壓力。K機的歌種包羅萬有，共有日美英加台港中成千上萬的歌曲任君選擇，但是使用前只有一個條件：保證你嘅歌聲唔會令你啲樓友聽到靈魂出竅。

 

翰林眾弟兄們個個都神懷絕技，熟讀經書，上知天文下知地理。古有竹林七賢飲酒作樂，今有翰林兄弟遊手好閒。成日當自己準備訓覺嘅時候，總會有一班人爆房入黎問：

「差你一隻腳！出黎pantry打牌啦！！！今晚血流成河！！ 」

「喂，肚唔肚餓，不如一齊call個宵夜食？」

「帶左部ps5番黎玩啦，同我單挑·多盤2K先訓啦！」

 

就算有幾攰都唔會抵抗到呢啲誘惑，口裏説不，身體卻很誠實地出去玩，1205同Pantry長期燈火通明，當你見到窗邊透出陽光，你就知你嗰日玩完喇⋯

 

除了日常晚晚玩通宵外，每逢佳節我地都會交換禮物，一齊踩樓單車環港島，一齊煮飯打邊爐，食飯睇戲，成班兄弟一齊玩得盡興；

 

到考試期間一齊發奮圖強溫書溫通宵，或生活遭遇諸多煩心事時，都總有一班兄弟會陪住你捱落去，發揚齊上齊落嘅精神。

 

各位翰林嘅兄弟都唔會甘於故步自封，閉關鎖國，而不時趁著sem break出發去鄰國學習外地文化。一句「不如去日本樓trip」就召集翰林兄弟學習東瀛文化；總玩得流連忘返，不亦樂乎，忘掉學業，生活帶來嘅一切煩惱。

 

一年又一年，有人加入翰林嘅大家庭就會有人離去，但係點解翰林嘅文化歷經咁多年仲可以川流不息？除了多謝讀左咁多年四書五經教俾我地嘅五千年文化外，仲要多得大家一齊去維繫，時常不論係hall定係唔係hall都會約出黎食樓飯，唱個K；雖然大家出處不同，但早已視大家為出生入死嘅好兄弟。

 

「節義春秋存銘澤 英逸之才出翰林」

 

翰林 高子林